Praxis Cumitatu

L'ancien blog Praxis Negra étant réactivé, le Comité informe que ce forum est désormais un simple atelier d'écriture. Les membres inscrits peuvent y proposer leurs textes en vue d'une publication sur Praxis Negra (en français) ou Tonu è Timpesta (en langue corse).


Atelier littéraire


Ne ratez plus rien ! Les nouvelles contributions s'affichent dans la colonne de droite de chaque rubrique. Vous pouvez également les lister en cliquant sur le lien " Voir les nouveaux messages depuis votre dernière visite", ci-dessus. Enfin, vous pouvez configurer votre profil pour être alerté lorsqu'un nouveau message est posté sur un sujet qui vous intéresse.

Ghjallochju - Strattu (Filippu Guerrini)

Partagez
avatar
Marco B
Admin

Messages : 422
Date d'inscription : 30/01/2013
24032014

Ghjallochju - Strattu (Filippu Guerrini)

Message par Marco B

À cavaddu trà u teatru è u rumanzu, Filippu Guerrini ci pruponi unu strattu di "Ghjallochju", un testu in iscrittura. I trè primi capituli, induva no scuntremu unu sgaiuffu tricaticciu à qual' piacini a musica elettrica è i fumeri, è una mamma chì t'avaria guasgi qualchì sumidda cù quidda discritta da Houellebecq in i Particules Elémentaires.




« O figliò ! Ùn ti ne poi invene ! » li disse u babbu. Ùn avii cà dui anni quandu mammata t’hà lasciatu solu in casa. Sbandunatu è bè ! A porta sarrata, s’era avviata, à pedi, ver di u portu di Nizza per piglià u battellu. Vultava in Bastia ind’è Zia Catalina. Forse chì t’averà avuta u core frantu, mà ùn era fatta per esse mamma. U stintu maternu ùn l’avia chì a vita a cunnisciva pocu è micca.
Tandu eu faciu u cruppieru à u Casinò municipale è t’aghju trovu pienghjendu è mughjendu di paura quandu sò intrutu in casa dopu à una partita indiavulata, à trè ore di mane. M’ai saltatu à collu ed eu t’allisciavu i capelli : « Cheta ti o figliulè ! ». Signuzzavi, à core sciappatu, ed eu ti marmuttulavu qualchì parulla per assirinatti  è pian pianinu ti sì acchitatu. T’aghju purtatu sin’è à u to lettinu è ti si addurmintatu. Aghju accarizzatu u to visu fendu ricullà attempu i linzoli nant’à e to spalle di creatura.
L’avemu aspittata assai tramindui, po’ senza prevene, una mane, hè vultata. U pichju nant’à a porta ùn ci pudia sbaglià. Ghjera ella. Aghju spallancatu a porta ed ghjera quì chì pienghjicava, un valisgione postu à i so pedi. L’aghju abbracciata forte forte è tù ti struffinavi à e so ghjambe. T’avemu presu in bracci è ti sì trovu à mezu à noi, basgiuchjavi à quandu à mamma, à quandu à mè. È a vita cumuna ripigliò cum’è si nienti fussi !
Per disgrazia, quessa ùn era chì a prima di e so scappate, di i so passi è veni, di i so coll’è falla, sicondu i scambiamenti di a so mente bistrocca è instabile ! Cum’è u ciucciu chì, senza fine, ghjetta u so ghjoculu po’ volta à circallu. Paria ch’ella ghjuchessi torna, senza vulella, a so propia storia da zitella. Ghjera cusì a to mamma ! Debbule è disgraziata assai ! È oghje chì ghjè oghje, sì spenghje pocu à pocu in sta camera bianca di stu spidalacciu nizzardu ! In fasa terminale hà dettu u medicu ! U cancaru di u pulmoni ! Vita brusgiata ! Puttana ladra !
Ma cumu ghjè chì mi sò messu à parlachjà cusì oghje ? Podarsi a necessità di palisà i sicreti piatti sin’è ad avali? A vichjaia zappa ogni ghjornu l’ortu di Pediniella è sentu ch’ella s’avvicina incù u so gran falcione. Ghjè scritta ! Immurtale ùn simu ! Ottanta nove anni à mumenti o figliò ! Avvedeci !
- Avvedeci o Bà !
I dui omi s’abbraccianu, pò si staccanu. Ognunu fila a so strada. Petru Ghjuvanni si volta è fighjula u babbu chì si ne và, u corpu ingubbatu è tortu da l’anni, cullendu pian pianinu i scalini chì sboccanu nant’à a stazzione di bus. Pensa ch’ellu u vede per l’ultima volta. I so ochji s’incroscianu. A tristezza inguttuppa a cità sana annigata ind’una nebbia zeppa è angusciosa. Principia à piove candilloni d’acqua pisiva è ghjallata chì sgottanu mischiendusi e lacrime di u vechju chì sparisce à pocu à pocu.

II

Ghjuntu in casa soia Petru Ghjuvanni s’accende u tizzone ch’ellu avia appruntatu nanzu è infrugna in a stereò u dischettu di u so gruppu predilettu : The sex Pistols. Pò si piglia a buttiglia di Paddy mentre chì u cantadore mughja à voce rivolta « God save the queen ! ». Si sciacca guasi a meza buttiglia di colpu po’ si fuma quella erbetta cumprata à un antru fratellu isulanu, chì li pare un incantu. Un bellu mischju trà l’Irlanda è a Jamaica. « God save the queen The fascist regime It made you a moron Potential H bomb God save the queen She ain’t no human being There is no future… » perseguisce à ughjulà Johnny Rotten, u capimachja di u first english punk band. Petru Ghjuvanni si mette à saltichjà, fendu move u so capu da a dritta à a manca, cum’è a ciccona di u campanile, scatinatu è bè, è lampa à più pudè un stridu addisperatu « Avvene ùn ci n’hè chì simu lecchi è bè ! ».
Li si paria d’esse abbandunatu, orfanellu d’un mondu spapersu è scimitulitu. Ùn ci capiva più nunda : a mamma si ne muria è u so babbu ùn era tantu quentu ! Ed ellu à cinquant’ anni passati firmava tale un pullastrone  chì si ne serebbe scurdatu di diventà maiò ! Un speziu d’andaccianu trigaticciu chì campava sempre à l’usu  « on the road again », un mischju di mullaccone alluppiatu è di suldatu persu di a revoluzione.
Acciaccatu è bè, Petru Ghjuvanni si lampò nant’à u vechju sedione incughjatu è s’addurmintò senz’altru.

III

Nizza 3 ore di mane… U timpanu di u telefuninu sveglia à Petru Ghjuvanni incalfatu in u so sedione. A bocca assiccata da u wiskhey cappia un « Allooo ! » di l’altru mondu chì pare un rambusciu. “Allo! Monsieur Pettorelli! Ici le docteur Blaive du Centre Antoine Lacassagne… C’est au sujet de votre maman… elle est tombée dans le coma…oui, c’est la fin… Bien sûr venez au plus tôt…Votre sœur est déjà à son chevet. »
Dopu à un’ ultima tasata di wiskhey ingullita à busgiu, s’infrugna à a lesta Petru Ghjuvanni in a notte pagna è nebbiacosa ver di u spidale duve a mamma tira l’anca. Corre à trunchera di collu in quellu curridore di a morte. Franca l’usciu di a stanza è vede a mamma duie cannucce in i nari è a pompa à murfina imbrancata in e so vene. L’ochji chjusi, coglie e buccate, u core prontu à schjuppà. Leria Maria, inchinata, li alliscia i capelli è l’azzeca cum’è s’ella fussi una creatura.  « Stà mi vicina ùn ti n’andà ti tengu cara… » ti n’inveni quand’è tù a ci cantavi…Ùn t’inchietà o Mà !... Mirà ! Simu qui à fiancu à tè, Petru Ghjuvanni ed eu, i to figlioli cari… Mammuchja ! Ci senti !... Iè chì ci sente !... agghjustò à voce intinnerita di u figliolu. Piglia à listessu  tempu a manu scarnita di a so mamma in a soia è a copre di basgiucci. Paria ch’ella ripigliessi fiatu cusì avvintata da l’affezzione di i so dui tesori. Ma à manu à manu si misse à sbuffulà, u pettu scuzzulatu da tante zerpittate, u corpu sticchitu, a bocca smurfiata in un sgrignu di morte.  I brioni à l’alba di Leria Maria, u scarpaccime di u medicu è di l’infirmiera, u rataleghju di mamma chì si n’andava à l’altru mondu, tuttu ribumbò in a chjoccula dighjà abbastanza schjuppata di Petru Ghjuvanni.  Li vinse tandu u vumacheghju è senza ch’ell’ ùn si possi fà nunda lintò un schizzilime di vomitu nant’à u linzolu murtuariu. Iè ! Avia resu e so trippe nant’à a salma di quella chì l’avia fattu esce da a so tambara ! Vergugnosu è acciacatu da u dulore pruvava à caccià cù i so ditti a tacca virdogna chì ghjuvava ormai di mazzulu incurunatu à a tinta di a so mamma. A surella u si strascinò sin’à a sala di bagnu     mentre chì l’infirmiera s’affaccendava à scambià u pannu.
Petru Ghjuvanni si richjarò u visu sustenutu da a surella. Po’ tramindui, cum’è s’elli fussinu isciuti d’una pittura taliana di u sedecesimu seculu, «  A madonna di i setti dulori » per indettu, avanzonu in prucessiò sin’è à mamma ch’avia chjusu l’ochji per l’eternità. Un surrisu fissu ma scherzosu à a punta di e labre testimugnava di tutte e burle è i culpacci ch’ella avia fatta in a so vita di scimità è di straziera.

Filippu Guerrini

Illustrazioni : Albrecht Dürer, Politticu di a "Madonna dei sette dolori" (ditagliu)
[/justify]
Partager cet article sur : Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

Message le Mar 25 Mar - 6:42 par Joseph Antonetti

Bellissimu è putente.
avatar

Message le Mar 25 Mar - 12:40 par Marco B

Trovu anch'eu... u mattaghjatu chì rendi nant'à a salma di a mamma morta... i mumenti teatrali di a scrittura... Dà a vodda di veda l'opara finita.

Message  par Contenu sponsorisé


    La date/heure actuelle est Mar 22 Aoû - 16:39