Un puema chì si duvaria intigrà à una pezza di teatru... Un falsu pueta Aliberti annant'à qualissu ùn si sà nudda... Mostri di fiera sciuti da una stodia ch'ùn esisti... Una lingua cismuntica scritta da un furdanu d'oltramonti... hè u Carnavali di i Cori Persi...
Carnavale di i Cori Persi
(in morte di u pueta Ghjuvanni Aliberti, 1861-1899)
Vi salutemu o ghjenti ghjuntu u carnavale
In e vostre cuntrate cù i monti d’argentu,
Aprite i balconi, currite u fiuminale,
Lasciate ripusà e zappe è u palmentu ;
Chì s’affacca ind’è voi u cìrculu sapiente
Cù ghjochi è stantarini, manghjadori di spade,
Zìngari bughjicosi, miràculi d’oriente,
Per voi emu marchjatu l’ore nant’à e strade.
Vi mustreremu quì un òrridu muntone,
A fiama d’un cultellu senza lu so sardiscu…
Stranu vi si era parsu quel capu d’un lione ?
Vi prupunimu noi l’osse d’un basgialiscu.
Venite à ammirà Gloria cù i so serpi
È a donna barbuta chì cunnosce l’amore,
U nannu Piripichju scupartu ind’è l’elpi
Forte cum’è un orsu è di listessu ardore !
Entrite à ascultà a mùsica tremenda
E pìrule malsane di i Fratelli Demonii
Cù trombe d’animali ô chì brutta faccenda !
Pusate è state à sente, suvitate i sogni
Cù Flavia a induvina chì leghje in e carte
U bellu matrimoniu o a crudele sorte,
È à nisunu prezzu voi ùn màncate l’arte
Di u Magu chì parla incù l’ànime morte !
Ma sopratuttu amichi ùn vi ci vole à move
Senza fighjà ste cose ancora più curiose :
Un omu natu scimia chì face di ‘sse prove
Da fà ride o pienghje, ma da veru famose.
Vulete ch’o vi dica u megliu ùn l’ete vistu
Daretu à stu tindone piattu sott’una stoffa
Batte malaviatu un ogettu spruvistu
Di carne è di fiatu, una visione goffa…
Di chì parlu o ghjenti ? Vi parlu d’un orrore,
Stòmacu vi ci vole è tene l’ochji aperti
Chì di a prisente mostra stu nùmeru hè u fiore :
U core in mille pezzi di u pueta Aliberti.
Marcu Biancarelli
Dernière édition par Marc Biancarelli le Mar 18 Mar - 13:16, édité 4 fois